-
"Vidi kako se smiješ" novi je singl benda „Vatra”, treći nakon „Sva naša ljeta” i „Carstva sunca”. Novi singl premijerno je pušten na talasima Radija D, i njime kako je kazao frontmen benda Ivan Dečak najavljuju deseti studijski album.

- Nadam se da će se svidjeti publici i moram reći da istovremeno objavljen i video spot koji možete pogledati na Jutjubu. Ono što je interesantno za video jeste da je snimljen iz jednog kadra nismo ništa nasnimavali. Tačno kad krene dok završi kamera je radila i pratila nas i jako mi se sviđa. Ima neku iskrenost u sebi. Što se tiče pjesme ja bih još rekao da sam se uželio ljudskih osmjeha, nekako svi smo zbog poznatih razloga sakrili svoja lica ispod maski koja nas štite od virusa, ali nas isto tako udaljavaju od svih onih stvari na koje smo navikli, od te neke energije koju dobijamo od izraza svojih lica pogotovo kroz osmijeh - kazao je Dječak.

Odličnu lokaciju za snimanje spota pronašli su u Dvorcu Janković u Suhopolju. „One take” snimanje zahtijevalo je dobru organizaciju i zalaganje cijele ekipe, a reditelj je do zadnjeg detalja slagao i tempirao kadrove, kako bi sve na kraju došlo na svoje mjesto.

- Pjesma je u nekakvoj borbi da kažem sa tim srećno tužnim momentima ali ja sam uvijek optimista pa vjerujem da uvijek pobijede veseli momenti i vjerujem da će se uskoro sve vratiti u normalu. Reditelj spota je Filip Gržinčić čovjek koga smo otkrili prije pola godine. Radi fenomenalne video spotove, napravio nam je spot za prošli singl Carstvo sunca. Došao je na ideju da spot bude iz jednog kadra u kojem mi se pridružila naša proslavljena glumica Helena Minić i ona zapravo vodi spot. Ja nekako pokušavam da uhvatim korak sa njom. Kroz spot prolazimo kroz neka emotivna stanja od nekakve ljutnje i svađe, do smirenja, sreće.

Dečak je otkrio da paralelno sa svojim pjesmama priprema i druge za novi album Masima Savića.

-Jako puno odlazim u prirodu gdje trčim gotovo svaki dan a kad se vratim sa trčanja onda pišem pjesme i htio ne htio meni treba svojevrsna izolacija za pisanje pjesama tako da zadnjih godinu imam te izolacije na pretek pa sam shodno tome napisao najviše pjesama u životu. Ne samo za Vatru nego paralelno radim i na albumu Masima Savića i evo prva pjesma koja najavljuje njegov album „Mali krug velikih ljudi” u Hrvatskoj je osvojila sve moguće nagrade koje su se mogle osvojiti i presrećan sam zbog toga. Ali nismo se zaustavili na tome, upravo je u studiju snima novi singl koji sam mu napisao. Dogovorili smo se samo da bude razmak između pjesme „Vatre” i njega bar jedno dva mjeseca da se sad baš ono ne tučemo u etru.

A.Š.

Foto:Matija Turkalj



Stiže prvi vinil Vatre

-Upravo je otisnuta naša prva ploča, prvi vinil, best of. Ploča se zove „Sva naša ljeta” i na ploči su sve pjesme koje su ljudi morali primijetiti da tako kažem naši najveći hitovi. Treba da izađe u aprilu i sad pregovaramo oko nekih koncerata kojim bi to trebalo najaviti ali u skladu sa situacijom, ploča će u svakom slučaju izaći. Prošle godine u decembru mislim da smo bili prvi bend na planeti koji je napravio onlajn turneju to je bila komercijalna turneja. Svake subote smo svirali, odradili smo ih šest ukupno svaki je bio drugačiji, jedan akustik, jedan elektrik jedan elektro-akustik.

---